ஆசிரியர் கல்வியியலாளர் சேவைக்கு புதிதாக 1090 பேரை உள்ளீர்க்க விண்ணப்பம் கோரல்

இலங்கை ஆசிரியர் கல்வியியலாளர் சேவை தரம் 3க்கு புதிதாக 1090 பேரை ஆட்சேர்ப்புச் செய்வதற்கு விண்ணப்பங்களை கல்வி அமைச்சு கோரியுள்ளது.

மட்டுப்படுத்தப்பட்ட போட்டிப்பரீட்சை மூலம் 706 பேரையும் திறந்த போட்டிப்பரீட்சை மூலம் 384 பேரையும் ஆட்சேர்க்க இந்த விண்ணப்பங்கள் கோரப்பட்டுள்ளன.

கடந்த வெள்ளிக் கிழமை (07) வெளிவந்த வர்த்தமானியில் இவ்விண்ணப்பம் கோரப்பட்டுள்ளது. விண்ணப்ப முடிவுத் திகதி மார்ச் மாதம் 6ஆம்  திகதி ஆகும்.

எழுத்துமூலப் பரீட்சை, நேர்முகப்பரீட்சை, தகுதி மதிப்பீட்டு நேர்முகப்பரீட்சை மற்றும் செயன்முறைப்பரீட்சை அடிப்படையில் தெரிவு இடம்பெறும்.

மட்டுப்படுத்தப்பட்ட போட்டிப்பரீட்சைமூலம் தேசிய கல்வியியற் கல்லூரிகளில் நிலவும் 253 வெற்றிடங்களும் ஆசிரியர் நிலையங்களில் நிலவும் 317 வெற்றிடங்களும் ஆசிரியர் கலாசாலைகளில் நிலவும் 136 வெற்றிடங்களும் மொத்தமாக 706 வெற்றிடங்கள் நிரப்பப்படவிருக்கின்றன.

இந்த 706வெற்றிடங்களில் சிங்களமொழி மூலத்தில் 340 வெற்றிடங்களும் தமிழ்மொழி மூலத்தில் 233 வெற்றிடங்களும் ஆங்கிலமொழி  மூலத்தில் 133 வெற்றிடங்களும் அடங்கும்.

திறந்த போட்டிப்பரீட்சைமூலம் தேசிய கல்வியியற் கல்லூரிகளில் நிலவும் 138 வெற்றிடங்களும் ஆசிரியர் நிலையங்களில் நிலவும் 172  வெற்றிடங்களும் ஆசிரியர் கலாசாலைகளில் நிலவும் 74 வெற்றிடங்களும் மொத்தமாக 384 வெற்றிடங்கள் நிரப்பப்படவிருக்கின்றன.

இந்த 384வெற்றிடங்களில் சிங்களமொழி மூலத்தில் 189 வெற்றிடங்களும் தமிழ்மொழி மூலத்தில் 122 வெற்றிடங்களும் ஆங்கிலமொழி மூலத்தில் 73 வெற்றிடங்களும் அடங்கும்.

மேலதிக தகவல்களுக்கு கடந்த வெள்ளிக்கிழமை (07) வெளிவந்த வர்த்தமானியைப் பார்க்கலாம்.

நன்றி – தினகரன்