வடக்கு வேலையற்ற பட்டதாரிகள் கவனயீர்ப்பு போராட்டத்தில்

வட மாகாண வேலையற்ற பட்டதாரிகள் இன்று (23) யாழ்ப்பாண மாவட்ட செயலகம் முன்பாக கவனயீர்ப்பு போராட்டமொன்றில் ஈடுபட்டனர்.

காலை 9 மணியளவில் இக்கவனயீர்ப்பு போராட்டம் முன்னெடுக்கப்பட்டுள்ளது. இப்போராட்டத்தில் நூற்றுக்கும் அதிகமானவர்கள் கலந்துகொண்டுள்ளனர்.

நீண்டகாலமாக வேலைவாய்ப்புகள் இன்றி அவதியுறுவது மட்டுமன்றி அரசியல்வாதிகளின் வாக்குறுதிகளை நம்பியும் ஏமாற்றமடைந்துள்ளதாகவும் அதனால் தாம் கடும் மன உளைச்சலுக்குள்ளாகியுள்ளதாகவும் வேலையற்ற பட்டதாரிகள் இதன்போது சுட்டிக்காட்டினர்.

கவனயீர்ப்பில் ஈடுபட்ட வேலையற்ற பட்டதாரிகள், மாவட்ட செயலக உதவி அரசாங்க அதிபரிடம் மகஜர் ஒன்றையும் கையளித்துள்ளனர்.